รวมเรื่องเก่า.......เล่าความหลัง
เรื่องที่ 1 นี่แหละเผิ่นเอิ้นว่า...ฉลาดกว่า...ลูกทิดเสกเล่นน้ำกับลูกทิดจ่อย...ลูกทิดเสกโตนลงไปในน้ำแล้วกะขึ้นมาหยิบเงินเหรียญ 10 ออกมาแล่วบอกลูกทิดจ่อยว่า
"กูมุดลงไปในน้ำเห็นปลาเล่นโบกกันอยู่ พวกมันย้านกูไปบอกตำรวจ มันจั่งจ้างกู 10 บาท ให่กูหนีไปเล่นทางอื่น"
ลูกทิดจ่อย บอก "บ่เซื่อ" จั่งโตนลงไปในน้ำ แต่โตนลงไปบ่เบิ่งให่ดี หัวไปถืกตอไม้เข่า หัวโปโหลกโป๊กขึ้นมา แล่วบอกลูกทิดเสกว่า
"กูกะมุดลงไปคือกัน เห็นมันเล่นอยู่ มันบอกรำคาญกูจึงเอาไม้ตีหัวกูเทียหนึ่ง หัวโปโหลกโป๊กอยู่นี่ และมันบอกกูว่าให่มาเอาเงินนำมึง 5 บาทไปซื้อยาหม่องมาทา".......
เรื่องที่ 2มื้อนี่เว่านิทาน "พ่อเถ่ากับลูกเขย" ตอน "กูสิบ้าตาย"
ครอบครัวหนึ่ง เผิ่นได่ลูกเขยใหม่ ๆ ด้วยความที่แม่เถ่ากะยังสาว ลูกเขยชื่อ "เสก" กะหล่อหลาย พ่อเถ่ากะเลยไล่ลูกเขยกับลูกสาวให้ไปนอนอยู่เถียงน้อยกลางนาพู้น...
มื้อหนึ่งมีญาติทางแม่เถ่า จากกรุงเทพฯ มาเยี่ยม เผิ่นมาลูกสาวแสนสวยมานำ พ่อเถ่าเผิ่นอยากฟันผู่สาวแต่กะเฮ็ดหยังบ่ได่เนื่องจากบ่เหมาะสม ด้วยความอยากฟันแต่เฮ็ดบ่ได่เลาจึงหลอยไปปรึกษากับลูกเขยที่เถียงนาน้อย...ตอนแลง ๆ
พ่อเถ่า "มึงต้องหลอยไปฟันให่ได้เด้อไอ้ทิด คั่นได่อีหลีกะเอาเผื่อพ่อนำเที่ยหนึ่ง"
ลูกเขย "สิฮู้ได่จั่งใด๋ว่าไผเป็นไผ เนื่องจากมันมืด"
พ่อเถ่า "มันสิยากหยัง อีนางนั่นมันใส่เสื้อแขนยาวสีลาย ๆ นั่นแหละ มันบ่เปลี่ยนเสื้อดอกเนื่องจากบ่มีน้ำอาบนั่นแหละ"
ลูกเขย "ตรงลงพ่อถ่าผมอยู่นี่แหละ เดี๋ยวผมสิมารายงานผล"
ลูกเขยโตแสบจึงตรงเข่าไปในบ้าน พอไปถึงกะคลานเข่ามุ้งเลย หลังจากค่อย ๆ เลือกเบิ่งเสื้อลาย ๆ แล่ว จึงลงมือ "ฟัน" อย่างสะใจ หลังจากนั้นจึงตรงไปรายงานให่พ่อเถ่าทราบที่เถียงน้อย..
ลูกเขย "เรียบร้อยแล้วเถ่าพ่อ อย่างฟิตเลย"
พ่อเถ่า "อึ้ย ๆ ได่เอาเผื่อพ่อบ่ล่ะ"
ลูกเขย "บ่ลืมดอก ฟันไป 3 เที่ยพู้นแล่ว"
พ่อเถ่า "5555 สะใจกูแล้วบาดนี่ กะซั่นกะขึ้นไปนอนไป้ พ่อสิเมือบ้าน"
หลังจากพ่อเถ่ากลับบ้านแล้ว กะคลานเข่าไปนอนใกล้ ๆ เมียเจ่าของ ทันใดนั้น เมียกะหันหน้ามา แล้วก็หอมแก้มผัวฟอดใหญ่ แล่วกะบอกว่า "ตั้งแต่อยู่กันมา มีมื้อนี้แหละเจ่าเฮ็ดถืกใจข่อยอีหลี ได่ตั้ง 3 ยกใหญ่ ๆ ข่อยว่าแมนเฮียนสิพัง"
พ่อเถ่าได้ฟังแค่นั้นกะมองซ้อดปานส่องท่อ แล้วกะฮ้องขึ้นดัง ๆ ว่า "ไอ้ทิด มึงนะมึง....โว้ย....กูสิบ้าตาย"
เรื่องที่ 3พ่อเถ่ากับลูกเขย ตอน "ลาบนกคุ่ม"
พ่อเถ่ากับลูกเขยชวนกันออกไปหานกคุ่ม หาจนบ่ายจึงได่นกคุ่มโตนึ่ง พ่อเถ่าจั่งซวนลูกเขยกลับบ้าน
พอกลับฮอดบ้านพ่อเถ่ากะขึ้นไปเบิ่งโทรทัศน์ รายการมวยไทย 7 สี ส่วนลูกเขยกะไปเอาน้ำให้ควายกิน แม่เถ่าได่นกคุ่มกะจัดการเฮ็ดลาบ ระหว่างที่กำลัง"ฟัก" นกอยู่นั่นเผิ่นกะลุกไปตัดก้านกล้วยเพื่อที่สิฟักใส่นำ เนื่องจากนกมันน้อย พอกลับมาปรากฎว่า หมา "อีด่าง" มันฟาดนกจนเรียบ พอแม่เถ่ามาเห็นกะนั่งลงอยากฮ้องไห้ เนื่องจากย้านผัวด่า ส่วนผัวที่เบิ่งมวยอยู่เทิ้งเฮือนกะเอิ้นถามว่า แล่วหือยัง ๆ หิวเข่าแล้ว
ลูกเขยกลับมาจากเอาน้ำให่ควาย เห็นแม่เถ่านั่งเหมิดอาลัยตายอยากอยู่ พอฮู้เรื่องกะเลย ลงมือจัดการ"ลาบก้านกล้วย" โดยบอกแม่เถ่าว่า อย่าบอกผู่ใด๋เด็ดขาด
เสร็จแล้วกะเอิ้นพ่อเถ่าลงมากิน โดยลูกเขยโตแสบออกหัวคิดว่า "กำลังเมื่อยอยู่กินบ่ได่" ส่วนแม่เถ่าออกโตว่า "เจ็บท้อง" ตอนที่กำลังแต่งพาเข่าอยู่นั่น เมียทิดเสกเผิ่นกะมาพอดี ทิดเสกเห็นเมียสิจ้ำ "ลาบก้านกล้วย" จึงสะกิดเมียว่า
"เถ่า ๆ มันสิบ่ผิดกะบูนเจ่าติ"
เมียได่ยิน จั่งตอบไปว่า "มันสิผิดได่จั่งใด่ ข่อยกะกินมาตั้งแต่น้อยเท่าใหญ่" ว่าแล่วกะจ้ำคำบักใหญ่ใส่ปาก
ส่วนพ่อเถ่าจอมกวน จ้ำใส่ปาก แล้วกะย่ำคำเข่าแจ็บ ๆ ๆ แล้วกะบอกว่า "ไผเป็นผู่เฮ็ดลาบนี้"
ลูกเขยตัวแสบย้านพ่อเถ่าด่าแม่เถ่า จึงฟ้าวออกโตว่า "ข่อยนี่แหละพ่อ"
พ่อเถ่าได่ฟังกะจ้ำคำใหญ่ ๆ ใส่ปากอีก พร้อมกับบอกว่า "แมงตาแตกนี่ เฮ็ดยามใด๋ แซ่บบบยามนั่น"
ลูกเขยโตแสบได่ฟังกะแอบยิ้มและสบตาให่แม่เถ่า......
เรื่องที่ 4นิทาน"ก้อม" มื้อนี้เสนอเรื่อง "ฝากเยี่ยว"
กาลครั้งหนึ่ง ชายคนหนึ่งชื่อ "เสก" เผิ่นได้เมียคนหนึ่ง อยู่กินกันมาโดนเติบ ผู่พี่อ้ายโตแสบกะแอบมองน้องเมียอยู่เงียบ ๆ คิดในใจว่า จักมื้อหนึ่งเผิ่นสิ"ฟัน" น้องเมียให่ได่........
มื้อหนึ่งอ้ายเสกเผิ่นกะไปไถนา คู่มื้อเมียกะสิหาบพาเข่าพาน้ำไปส่ง แต่มื้อนี้เลาบ่ว่างกะเลยให่ น้องเมียไปส่งเข่าพี่อ้ายแทน.........ผู่เป็นพี่อ้ายเห็นน้องเมียหาบเข่ามากะแอบยิ้มอยู่ในใจ มื้อนี่แหละ เป็นโอกาสทองแล้ว.......พอน้องเมียแต่งเข่าลงและเอิ้นเลาไปกินเข่า...
พี่เสก "เป็นจั่งใด๋น้องหล่า เมื่อยบ่แดดมันฮ้อน ๆ หลาย"
น้องเมีย "อย่าเว่าเรื่องอื่นหลายพี่อ้าย ฟ้าว ๆ กินแน ข่อยปวดเยี่ยว"
พี่เสก "อ้าว...โตคือบ่ไปเยี่ยวล่ะ คั่นย้านคนเห็นกะไปทางป่าพู้นน่ะ อ้ายบ่จอบเบิ่งดอก"
น้องเมีย "บ่ได่ดอก อี่แม่บอกว่า คั่นปวดเยี่ยวกะให่ไปเยี่ยวใส่คอกควายพู้น มันสิได่เป็นปุ๋ย"
พี่เสก "อ้ายกะปวดเยี่ยวคือกัน กะซั่นอ้ายฝากเยี่ยวไปใส่คอกควายนำเด้อหล่า"
น้องเมีย "สิฝากกะฟ้าวฝากติล่ะ ข่อยสิทนบ่ไหวแล้ว"
พี่เสก "ฝากแถวนี่บ่ได้ดอกคนสิเห็น ไป้...ไปทางป่าพู้น"
น้องเมีย "ไปกะไป"
หลังจากฝากเยี่ยวเรียบร้อยแล้ว อีนางหล่าเผิ่นกะฟ้าวแล่นเมือบ้าน พอไปฮอดบ้านกะตรงเข้าไปคอกควายทันที..และนั่งลงเยี่ยว..
"นี่เยี่ยวของกู" เลาเยี่ยวหน่อยเดียวกะเขยิบไปอีกหม่องแล่วกะบอกว่า "นี่เยี่ยวพี่อ้ายกู" แล่วกะเขยิบไปอีกหม่อง "นี่เยี่ยวกู" นี่เยี่ยวพี่อ้ายกู" จนว่าเยี่ยวสุด.....เผิ่นกะเลยแอบยิ้มและเว่าในใจว่า "มื้ออื่นพี่อ้ายสิฝากเยี่ยวอีกบ่น้อ เจ็บ ๆ คัน ๆ มีแฮงดี โอ้ย..เว่าแล่วอยากฮอดมื้ออื่นไว ๆ"
