คำปื้นตี้ฮัก จักว่าไขจ๋า ลักข้ามฝั่งมา น้ำตาอาบแก้ม
มาบอกปี้หนาน ท้าวไส มันแกล้ง ลักนอกใจ๋แปงปอตุ๊ก
หวังข้ามฝั่งมา เอาหน้ามาซุก อกอุ่นของอ้าย หนานเมือง
ปี้หนานก่อเจื้อ แม่ต๋องใบเหลือง แม่หล้าต๋อเฟือง แม่เหลืองใบข้าว
เอาอกเอาใจ๋ เลี้ยงน้ำเลี้ยงข้าว ปอฮอดปาเจ้าอยู่ตวย
สะลีมุ้งหมอน ผ้าปู๋สวย ๆ เป๋นสนามมวย ของข้ากับเจ้า
เมื่อวันเยียะก๋าน เมื่อคืนก่อ ด้าววว ปาเจ้าสู่ห้วงฉิมพลี
หน้ามืด ต๋ามัว เมาหาก้า หวี ตกก๋างสะลี สะตางปอเสี้ยง
ปอวันนี้มา คำปื้น ใจ๋เมี้ยง หื้อผัวเก่าเจ้าปาไป
ลักแผวสะลี มุ้งหมอนหม้อไห เหลือก้าเตี่ยวในไว้ดูต่างหน้า
อนิจจานัง ตั๋วปี้หนานข้า นั่งสูบใบยา บ่อฟื้น
เหล้าขาวสามตอง กับ น้ำตาจื้น สะอึก สะอื้น บ่อวาย
นั่งผ่อน้ำของ หยังมาใคร่ต๋าย นึกแล้วเสียดาย อยู่ไปตางหน้า
ปอกั๋นแหมแล้วแม่สาวหล่ายหน้า คำปื้น น้องยา ขอลาก่อนสวัสดี
..................เฮ้อ..................ฟังลุงป้าว ว่าสาวคำปื้น หักอกสะอื้น บ่อฟื้นตกใจ๋
ว่าเป๋นจาใด แป๋งใจ๋เหียไกล๋ ตวยไปกับจู๋ กู่เกยโอบอ้อม
ละไว้ของฮัก ตี้มักใจด้อม คือเตี่ยวในก้อม ตั๋วเดียว
ป๊าดโท๊ะลุงเหย ของเกยฮ่วมใจ้ ตัดใจ๋เหียได้ จ๊างมัน
ผ่อไปตางหน้า มืนต๋าก่อหัน มีแห๋มเป๋นปัน ถ้าฝันไค่ได้
ซะป๊ะป้าวเอ๋ย แม่เหมยชิดใกล้ จะเอาจาใด ว่าแต้
คนดำต่ำขาว สูงยาวแพ้แล้ บ่อมีข้อแม้ อย่างใด
แม่หม้ายใจ๋กว้าง แม่ฮ้างต๋าใส แม่ก้าลำไย มีใจ๋ไค่หื้อ
ข้าราชะก๋าน คนงานซื้อบื้อ แขกลาวไตลื้อ ขอต๊า
ปี๋ใหม่ฮอดแล้ว ต้องแกล้วหาญกล้า อกชายชรา จื้อป้าว
แม้ใจ๋ปวดร้าว ป้าวต้องบ่อถอย ป้าวจะลองกอย ขอจอยซักตั้ง
ยืดอกแสนเหี่ยว เม้มเตี่ยวขอรั้ง ฟั่งกระโดดขึ้น เวที .......... เวย ๆ ลุงป้าวขะใจ๋ขึ้นเวที เวย ๆ......................แฮ่ ๆ
แต่งบ่อถูกบ่อเถือจะไปว่ากั๋นเน้อ มอบเป๋นกำลังใจ๋หื้อลุงป้าวบ่อดาย อะละ อะละ.....อู้เล่นบ่อดายบะย่ะ................
