................โอ้จีวิตฮัก อกหัก หนักหนา เป๋นสังใดจา อกหักยามเฒ่า
คำปื้นน้องสาว คนลาว หล้าเจ้า มาจุคนเฒ่า คนไทย
เห็นมุ้งสะลี น้ำต๋าปอไหล อุตส่าห์แปะไป เจ็ดร้อยซาวห้า
ผ้าห่มแหมกำ ซื้อกาดหล่ายหน้า หมอนนั้นปู่ตา เขาให้
สะลีมุ้งหมอน ยังบ่อได้ใจ้ มาละข้าไปเสียแล้ว
อ้ายยู อ้าขาง ลุงปู๋ ดักแฮ้ว อ้ายหน่อ หนานแก้ว ก๋าสะลอง
อ้ายดีซ้ำฮ้าย อ้ายต๋อป้อหลวง อ้ายแค็บก่อลวง ซ้ำเติมข้าเจ้า
ว่าเมาแม่ฮ้าง หลงตางต่อนเฒ่า ก็ย้อนว่าเมา แจ๊ะแมะ
ปอละ ปอละ ตึงบ่อข้องแวะ เจ้าะเมาะ แจ๊ะแมะ หลอกลวง
ตั้งนี่ต่อไป จะตานปอยหลวง จะเซาะมาควง เป๋นบ่าวหนุ่มหน้อย
...........อ๋ายยยยย อ๋ายยยยยยยย
รำคาญอ้ายป้าว เมื่อใดก่อโดนสาวลาวหักอก รำคาญ เบื่อ ๆ ๆ เฮ้อ
จะขอว่าหื้อดี ๆ กำลอจะไปโขดกั๋นเน้ออ้ายป้าว แต้ ๆ นา
...
เอาละเน้อ....................อะแฮ้ม อะแฮ้ม
..........พรหมลิขิต จีวิตของป้าว เมื่อถูกสาวลาว มาฮ้าวหักอก
แป๋งน้ำต๋าไหล นั่งไห้ซกซก ฮ่ำหาผ้าป๊ก สะลีหมอนมุ้ง
เป๋นสังใดหา แม่ต๋าสายรุ้ง บ่อหื้อไปยุ่ง กับน้อง
..........ยังมากล่าวหา เซาะว่าเปื้อนป๊อง ว่าบ่อเกี่ยวข้อง เอาใจ๋
ขาง , ดี , ว่าฮ้าย ต๋อ , อ้ายหน่อ ,ปู๋ ก๋าสะลอง ,ยู หมู , อู้จ๋นจ๋อย
จะเลิกแม่ฮ้าง แนบข้างหนุ่มหน้อย จวนกั๋นตานปอย ว่าอั้น
..........จะว่าหื้อเขา ผ่อเฮาก่อนนั้น ว่าสายต๋าสั้น มอกใด
หันก่าแม่ฮ้าง ตี้ฮ่างขาวใส ต๋าใกล้บ่อยาว หันสาวบ่อได้
ละเปื้อนละป๋าง จนห่างเหียไก๋ แล้วเป๋นจาใด เด๋วนี้
..........ว่าจะอดใจ๋ เอาไว้บ่อจี๊ ก่อหันแก่ปี้ น้องเฮา
ปิ๊กมาละน้อ จะขอกล่อมเกล๋า ว่าเป๋นแต่เจ้า บ่อเข้าใจ๋แจ้ง
เฮาเป๋นคนจ๋น ดิ้นรนใจ้แกล้ง แหนมเฒ้าอย่างแฮ้ง แฮงสิ้น
..........ใส่เตี่ยวก้นปุ๊ด เสื้อกุ๊ดแขนหิ้น เซาะหากิ๋นจิ้น บ่อมี
ไผบ่อไค่ใกล้ ยังไค่กิ๋นหมี นิสัยบ่อดี ยังมีเป่อเล๊อะ
ขอหื้อกลับใจ๋ นิสัยบ่อเพ๊อะ จะมีแหมเยอะ กู้ซ้อน
..........น้ำของแห้งหนา เฮาปากั๋นส้อน ปล๋าบึกปล๋าช่อน ทำพันธุ์
พญานาคแก้ว มาแล้วเฮาหัน เก็บลูกเพาะพันธุ์ จ่วยกั๋นกู้มื้อ
จ่อมเบ็ดเซาะหา ข้าวป๋าบ่อซื้อ บ่อนานก่ออื้อ รวยแล้ว
...........ถ้าเฮามีเงิน จะเจิญเปื้อนแก้ว มาฮ่วมเจื้อยแจ้ว ฮ้องเพลง
โอเกะโอกี้ โยตี้โยเตง มาร่วมบรรเลง ครื้นเครงถ้วนหน้า
สาวหน้อยสาวนิด จิดริ๊ดน้องหล้า จะปากั๋นมา หมดไซ้
..........อู้มาแต่จ้าว หวังป้าวเข้าใจ๋ บ่อต้องมาไห้ งอแง
เอาเงินมาก๋อง เอาทองมาแชร์ ฮ่วมทุนกั๋นแต้ ข้อแม้ฮ่วมฮู้
ลุงดีมีใจ๋ มีไฟฮ่วมสู้ แต่เงินขอกู้ ลุงคำ
............
ตี้อู้มานัก หวังจักจ่วยก๊ำ ลุงตึงบ่อซ้ำ เติมนาย
อู้จ๋นขวาย กาดวายแล้วเจ้า กิ๋นลาบควายเฒ้า ก่อนเน้อ จายเฮย
ไปละไปกิ๋นลาบควายเฒ่าก่อน มันไปเมาควายแม่บ่อปิ๊ก เจ้ามันเลยเอาฆ้อนบุ๊บหัวมันเอามาลาบเรียบร้อย
