ขอจ๊ดปากอ้ายป้าวกำหนึ่งก่อน
ก้าว่าหื้อลุงเหน็ดล้ำไป เดวลุงจะจ๊ด 7 กำ ก้าว่าหื้อลุง 2 กำ สุ่ยหลานสาวลุงงาจุ๊ลุงดี 5 กำ
เดวได้ตี้ละขอว่าหื้ออ้ายป้าวพ่อง อะแฮ้ม.................เดว ขอยกแหมบอกก่อน...
..........ลุงงาน่อลุงงา เป๋นต่าลุงงานั้นเน๊าะ.............งานนี้ถ้าบ่อได้ส้ายบ่อใจ้ดีหลึก.............
..........ว่าแล้วลุงงา ไห้มาเดือดซ๊าว เสียงหยั่งปู่ป้าว มาต้าวความหลัง
ว่าจะต้องจี้ เรื่องตี้หมดหวัง เรื่องหัวใจ๋พัง เพราะสาวหล่ายหน้า
ทำเป๋นเฉไฉ สนใจ๋น้องหล้า ลูกหลานลุงงา เสียด้วย
..........ว่าหื้อดีหลึก ว่าคึกไค่จ้วย หื้อรถราตวย ทาวน์เฮ้าส์
สุ่ยหื้อน้องไท้ จุ๊ใจ๋คนเฒ้า มาหลงมัวเมา เต่งเต้าน้องหน้อย
เมื่อจบได้ก๋าน ก้อยหาญหายจ้อย บ่อต้องผ่อกอย ตั๋วปู้
..........ละลุงหื้อไห้ ผ่อนใจ้เงินกู้ หนีไปกับจู๊ เสียอั้น
โอ้ว่าลูกหล้า หลานจ๋าลุงนั้น มีใจ๋ฮักมั่น บ่อปั๋นไปกว้าง
ถ้าฮักลุงดี บ่อมีทิ้งขว้าง บ่อหื้ออ้างว้าง ห่างไป
..........อย่าฟังกำเหนือ อย่าเจื้อกำใต้ น้องจะหม่นไหม้ อย่างป้าว
ขอลุงดีหลึก แน่นปึ๊กกับสาว กับน้องทองกวาว แม่สาวใจ๋สู้
อย่าละทิ้งฮ้าง เหมือนอย่างเขาอู้ ขออยู่เป็นกู้ ลุงก้ำ
..........ลุงบ่อมีดี อย่างตี้เขาซ้ำ แต่ก่อบ่อล้ำ เหลือขอ
บะผางก๋ำปอ ลองผ่อก๋านใจ้ กิ๋นดิบสุกได้ ต๋ำได้ดองดี
สุดกำกึ๊ดแล้ว แม่แก้วผ่องศรี ขอสวัสดี ลาทีก่อนเน้อนาย (นาง) เฮย........หือ เกือบต๋าย
